Energjia elektrike dhe strukturat paralele
Borxhi total i qytetarëve të Kosovës ndaj Korporatës Energjetike të Kosovës (KEK) është rreth 300 milionë euro. Kjo është rryma që konsumohet, faturohet dhe nuk paguhet. Ky borxh publik përdoret si arsyetim për të shpjeguar ndërprerjet e tmerrshme të rrymës që dëmtojnë posaçërisht zonat jashtë qendrës së Prishtinës, ndonëse edhe ata që i paguajnë faturat e tyre vuajnë nga mungesa e saj. Sipas reportazheve mediale enklavat serbe janë përgjegjëse për afro 120 milionë nga borxhi publik total ndaj KEK-ut prej 300 milionë eurosh. Kjo do të thotë se 5% e popullatës është përgjegjëse për 40% të borxhit publik ndaj KEKut.
Kjo nuk shpjegohet me nivelet e ndryshme të varfërisë, nga e cila shqiptarët dhe serbët vuajnë njësoj. Për një pjesë të këtij borxhi është detyrues Genex-i, kompania serbe që e drejton ilegalisht qendrën e skijimit Brezovica në Shterpce. Për pjesën e mbetur janë borxh serbët të cilëve nuk u lejohet të paguajnë faturat e tyre nga strukturat paralele të Serbisë, qëllimi i të cilave është të pengojnë çfarëdo forme të integrimit të serbëve në Kosovë. Deri para pak kohësh KEK-u nuk e ka ndërprerë furnizimin me rrymë për enklavat serbe, sepse kjo konsiderohej nga UNMIK-u si problem politik. Por në anën tjetër, shqiparët kanë pasur dhe ende kanë
ndërprerje të vazhdueshme të rrymës. Tani vonë KEK-u ka filluar të refuzojë t’i riparojë sistemet e dëmtuara në enklavat serbe derisa të firmosin kontratën me KEK-un dhe të kthejnë borxhin për faturat e tyre të papaguara. Nën direktivat e
strukturave paralele serbët i kanë refuzuar këto kushte sepse kjo do të thoshte të pranonin Kosovën si shtet. Kjo është përcjellë me një numër protestash,
si ajo në Shillovë e udhëhequr nga Dragan Nikoliçi, kryetari i strukturave ilegale paralele serbe të Rajonit të Anamoravës. Kur serbët në Shillovë, të prirë nga
Dragan Nikoliçi, kishin bllokuar rrugën kryesore që lidh Gjilanin dhe Dardanën, policia kishte ndërhyrë për të hapur rrugën. Kjo ndërhyrje ishte përshkruar atëherë nga Kryetari Tadiç në Këshillin e Sigurimit si “agresion” dhe dëshmi se “serbët janë komuniteti më i rrezikuar në gjithë Evropën e qytetëruar”.
Si pasojë e këtij konfrontimi ndërmjet KEK-ut dhe enklavave serbe strukturat paralele serbe tani kërkojnë që enklavat të furnizohen me energji elektrike nga kompania elektroenergjetike e Serbisë EPS. Kjo do të zgjeronte ndarjen etnike dhe
institucionale të propozuar në Gjashtë Pikat edhe në fushën e energjisë elektrike. PSSP-ja Zanieri i kishte rekomanduar, asgjë për t’u befasuar, Këshillit të Sigurimit që këtë çështje të zgjidhte Grupi Punues Teknik Prishtinë-Beograd, duke synuar kështu përshrirjen e negociatave me Serbinë rreth asaj se kush do të jetë furnizuesi i energjisë dhe kush do të paguajë për të në Kosovë.
Derisa qeveria e Kosovës nuk bën asgjë për t’i
arrestuar njerëzit që operojnë me 25 komunat
paralele të Serbisë, si dhe me strukturat e tjera
të saj brenda Kosovës, ndalimi i zyrtarëve të
Serbisë jashtë Kosovës për të hyrë në vend
është vetëm marketing.
Fri Apr 10, 2009 10:59 pm
